ក្រសួងសង្រ្គាមអាមេរិកបានចេញសេចក្តីប្រកាស ដាក់បញ្ចូលក្រុមហ៊ុនយក្សរបស់ចិនចំនួន៣ រួមមាន ក្រុមហ៊ុន Alibaba, Baidu និងក្រុមហ៊ុន BYD ក្នុងបញ្ជីខ្មៅ ដោយចោទថាបានសហការបម្រើឲ្យកងទ័ពចិន។ ចំណែក អ្នកតំណាងរបស់ក្រុមហ៊ុនចិនទាំង៣ បានច្រានចោលការចោទប្រកាន់របស់ក្រុងវ៉ាស៊ីនតោន ថាគ្មានមូលដ្ឋានច្បាស់លាស់។ រីឯ ក្រុងប៉េកាំងបានបញ្ចេញប្រតិកម្ម ប្រឆាំងយ៉ាងដាច់អហង្ការ ចំពោះការចោទប្រកាន់របស់រដ្ឋបាលលោក ដូណាល់ ត្រាំ និងទាមទារឲ្យក្រុងវ៉ាស៊ីន កែតម្រូវសេចក្តីសម្រេចរបស់ខ្លួន ជាបន្ទាន់។

នៅថ្ងៃទី៨ ខែមិថុនា ឆ្នាំ២០២៦ ក្រុមអង្គការសង្គមស៊ីវិលចំនួនជាង៥០ បានអំពាវនាវឲ្យរដ្ឋាភិបាលកម្ពុជា សមាគមនិយោជក ម៉ាកយីហោអន្តរជាតិធំៗ និងអ្នកបញ្ជាទិញធ្វើសកម្មភាពជាបន្ទាន់ដើម្បីការពារសុវត្ថិភាពកម្មករវិស័យកាត់ដេរនៅកម្ពុជា។ ការអំពាវនាវរបស់ក្រុមអង្គការសង្គមស៊ីវិលដូចនេះធ្វើឡើង បន្ទាប់ពីមានកម្មករជិត ១០០នាក់បានស្លាប់ និងរបួសនៅក្នុងគ្រោះថ្នាក់ចរាចរណ៍ផ្ទួនៗកាលពីខែឧសភាកន្លងទៅ អំឡុងពេលពួកគេធ្វើដំណើរទៅកាន់កន្លែងធ្វើការ។

នៅថ្ងៃទី៩ ខែមិថុនានេះ លោក ហ៊ុន សែន ប្រមុខរដ្ឋស្តីទីបានចុះជួបជនភៀសសឹកខ្មែរស្ថិតក្នុងខេត្តបន្ទាយមានជ័យ ក្បែរព្រំដែនថៃ។ នៅចំពោះមុខជនភៀសសឹកប្រមាណ ៣ពាន់គ្រួសារ អតីតនាយករដ្ឋមន្ត្រីកម្ពុជារូបនេះបានប្រកាសសុំទោសជាសាធារណៈចំពោះពលរដ្ឋខ្មែរដែលកាលពីលោកមានអំណាចពេញដៃ តែបែរជាមិនបានត្រៀមខ្លួនទុកមុនក្នុងការប្រយុទ្ធជាមួយថៃ។ លោក ហ៊ុន សែន បានទទួលស្គាល់ថា សង្គ្រាមដែលថៃបើកការឈ្លានពានលើកម្ពុជាកាលពីឆ្នាំ២០២៥ គឺដោយសារតែលោកមានការទុកចិត្តខ្លាំងពេកលើភាគីថៃ។ 

នៅថ្ងៃទី៩ ខែមិថុនា ឆ្នាំ២០២៦ រដ្ឋមន្ត្រីក្រសួងការពារជាតិកម្ពុជាលោក ទៀ សីហា បានបញ្ជាក់នៅលើបណ្តាញសង្គមហ្វេសប៊ុករបស់លោកថា កម្ពុជាមិនបានបង្កើនកម្លាំងទ័ពដើម្បីបង្កើតសង្គ្រាមជាថ្មីជាមួយថៃទេ។ ការបញ្ជាក់របស់រដ្ឋមន្ត្រីការពារជាតិកម្ពុជាដូចនេះ គឺជាការឆ្លើយតបទៅនឹងការចុះផ្សាយរបស់សារព័ត៌មានថៃដែលថា លោកបដិសេធការប្រើយន្តការទ្វេភាគី និងកំពុងបង្កើនទ័ព ព្រមទាំងសព្វាវុធ ដើម្បីតតាំងជាមួយថៃនាពេលខាងមុខ។

ប្រមុខរដ្ឋាភិបាលកម្ពុជា និងវៀតណាមបានប្តេជ្ញាចិត្តបន្តជំរុញទំនាក់ទំនងទ្វេភាគីឲ្យកាន់តែស៊ីជម្រៅ និងឈានទៅដល់កម្រិតខ្ពស់ថ្មីមួយទៀតក្នុងស្មារតីជាអ្នកជិតខាងល្អដើម្បីបន្តកិច្ចសហប្រតិបត្តិការគ្រប់ជ្រុងជ្រោយ និងមានស្ថិរភាពយូរអង្វែង។ នេះជាការគូសបញ្ជាក់របស់នាយករដ្ឋមន្រ្តីកម្ពុជាលោក ហ៊ុន ម៉ាណែតនៅលើទំព័រហ្វេសប៊ុកផ្លូវការរបស់លោកក្នុងថ្ងៃទី៨ ខែមិថុនា ឆ្នាំ២០២៦។ ការបញ្ជាក់ដូចនេះធ្វើឡើងនាឱកាសដែលលោកកំពុងបំពេញទស្សនកិច្ចនៅវៀតណាមដើម្បីចូលរួមនៅក្នុងវេទិកាអនាគតអាស៊ាន លើកទី៣ ក្នុងទីក្រុងហាណូយ។

លោក​ប្រធានាធិបតី​អ៊ុយក្រែន បានជួបប្រជុំ​នៅទីក្រុងឡុងដ៍ ថ្ងៃចន្ទទី៨មិថុនា​ ជាមួយ​ប្រមុខដឹកនាំបារាំង អង់គ្លេស និងអាល្លឺម៉ង់​។ ថ្នាក់ដឹកនាំមហាអំណាចអឺរ៉ុបទាំង៣ បានយល់ស្របគ្នា គាំទ្រចំពោះ​គំនិតរបស់​លោកហ្សេឡេនស្គី ដែល​​ចង់​ជំរុញ “យន្តការ​សន្ទនា​ ចរចាគ្នាដោយផ្ទាល់” រវាងអ៊ុយក្រែននិងរុស្ស៊ី​។ ការចរចាដោយ​ផ្ទាល់ ដែល​មានន័យថាអ៊ុយ​ក្រែនមានសិទ្ធិស្មើមុខ​ជាមួយរុស្ស៊ី ហើយមួយវិញទៀត គឺមិនចាំ​បាច់​ឲ្យ​មានសហរដ្ឋអាមេរិក​ ធ្វើជាអ្នកសម្របសម្រួលទៀតឡើយ​។

ប្រធានាធិបតីចិន លោក ស៊ី ជីនពីងបានធ្វើដំណើរទៅដល់ទីក្រុងព្យុងយ៉ាង នៅថ្ងៃចន្ទ ទី៨ មិថុនា។ កម្មវត្ថុនៃដំណើរទស្សនកិច្ចផ្លូវរដ្ឋ រយៈពេល២ថ្ងៃ នៅកូរ៉េខាងជើង គឺដើម្បីរឹតចំណងទំនាក់ទំនងទ្វេភាគី ចិននិងកូរ៉េខាងជើង ឲ្យកាន់តែស្អិតល្មួត។ នៅអំឡុងទស្សនកិច្ចនៅកូរ៉េខាងជើង លោកស៊ី ជីនពីងបានបង្ហាញពីការគាំទ្រ យ៉ាងពេញទំហឹង ចំពោះរបបកម្មុយនិស្តកូរ៉េខាងជើង និងបានចាត់ទុក ទំនាក់ទំនងទ្វេភាគី ចិននិងកូរ៉េខាងជើង ថាជាមិត្តភាពដែលមិនអាចបំបែកបាន។

គណបក្សកម្លាំងជាតិ ដែលជាគណបក្សប្រឆាំងមួយនៅក្នុងប្រទេសកម្ពុជាបានប្រមូលស្នាមមេដៃពីអ្នកគាំទ្រ និងពលរដ្ឋខ្មែរចំនួនជាង ៥ពាន់នាក់ដើម្បីដាក់ឯកសារប្តឹងមេដឹកនាំថៃទៅតុលាការព្រហ្មទណ្ឌអន្តរជាតិ (ICC)។ បណ្តឹងរបស់គណបក្សកម្លាំងជាតិសំដៅលើការទទួលខុសត្រូវរបស់មេដឹកនាំថៃដែលបានឈ្លានពានបូរណភាពទឹកដីកម្ពុជា និងទាមទារសំណងដែលយោធាថៃបានបំផ្លិចបំផ្លាញហេដ្ឋារចនាសម្ព័ន្ធ និងអាយុជីវិតពលរដ្ឋខ្មែរ។ នេះបើតាមការប្រកាសរបស់មេដឹកនាំគណបក្សកម្លាំងជាតិនៅក្នុងសន្និសីទកាសែតមួយនាថ្ងៃទី៨ ខែមិថុនា ឆ្នាំ២០២៦។

នៅថ្ងៃចន្ទ ទី៨ ខែមិថុនា ឆ្នាំ២០២៦ នេះ អង្គការសិទ្ធិមនុស្សលីកាដូបានអំពាវនាវឲ្យកម្មវិធីអភិវឌ្ឍន៍អង្គការសហប្រជាជាតិ UNDP ប្រចាំនៅកម្ពុជាកែសម្រួលឡើងវិញនូវថ្នាលវិនិយោគិន SDG (SDG Investor Platform) និងគេហទំព័រផែនទីសម្រាប់វិនិយោគិនពាក់ព័ន្ធនឹងគោលដៅអភិវឌ្ឍន៍ប្រកបដោយចីរភាព (SDG Investor Map) ដោយដកចេញនូវក្រុមហ៊ុនដែលមានជាប់ពាក់ព័ន្ធនឹងការរំលោភសិទ្ធិមនុស្ស។ ទន្ទឹមគ្នានេះ លីកាដូក៏បានស្នើឲ្យស្ថាប័នទទួលពាក្យបណ្តឹងផ្ទៃក្នុងរបស់ UNDP ពន្លឿនដំណើរការនៃបណ្ដឹងរបស់ពលរដ្ឋដែលប្តឹងពីបញ្ហារំលោភសិទ្ធិផ្សេងៗដែលនៅមិនទាន់មានដំណោះស្រាយជាក់លាក់នៅឡើយ។

នៅក្នុងរបាយការណ៍របស់ខ្លួនចេញផ្សាយថ្ងៃទី៧ មិថុនា ឆ្នាំ ២០២៦ អង្គការលើកលែងទោសអន្តរជាតិ Amnesty International បានអះអាងថា ការបង្ក្រាបបទល្មើសឆបោកអនឡាញនៅកម្ពុជាបានបរាជ័យ និងខ្វះតម្លាភាពនៃនិតីវិធីចុះបង្ក្រាប។ ហេតុផលត្រូវបានរបាយការណ៍លើកឡើងថា គឺដោយសារទីតាំងដែលអាជ្ញាធរកម្ពុជាចុះបង្ក្រាបមានចំនួនតិចតួច បើធៀបនឹងទីតាំងធ្វើប្រតិបត្តិការជាក់ស្តែង និងថា អាជ្ញាធរក៏មិនបានខ្វល់ខ្វាយពីកិច្ចការពារជនរងគ្រោះ និងការជួញដូរមនុស្សឡើយ។ 

គ្រោះមហន្តរាយរញ្ជួយដីកម្រិត ៧,៨រិចទែរ បានកើតឡើងនៅភាគខាងត្បូងហ្វីលីន នាថ្ងៃចន្ទ ទី៨ មិថុនា។ បើយោងតាមអាជ្ញាធរហ្វីលីពីន ក្នុងគ្រោះរញ្ជួយដីដ៏កំណាចនេះ បានបណ្តាលឲ្យមនុស្សស្លាប់យ៉ាងហោចណាស់ ១៥នាក់ និងរបួសជាង១០០នាក់ ព្រមទាំងបានធ្វើឲ្យអគារជាច្រើនបាក់ស្រុត រាបដល់ដី។ ចំណែក វិទ្យាស្ថានភូគព្ភសាស្រ្តអាេមរិក បានប្រកាសអាសន្នរលកស៊ូណាមិ នៅសមុទ្រប៉ាស៊ីហ្វិក។

បទឈប់បាញ់​ក៏ដូចជាការចរចា រវាងអ៊ីរ៉ង់​ និង​សហរដ្ឋអាមេរិក​ កំពុងតែស្ថិតនៅត្រង់ចំណុចគ្រោះថ្នាក់ បន្ទាប់ពី​អ៊ីរ៉ង់ និងអ៊ីស្រាអែល បានចាប់​ផ្តើម​បាញ់ប្លោងគ្រាប់ដាក់គ្នាសាជាថ្មី​ នៅរវាង​យប់ថ្ងៃអាទិត្យ​និងថ្ងៃចន្ទ​ទី​៨​មិថុនានេះ​។ ​លោកដូណាល់ ត្រាំ បាន​ទូរស័ព្ទ​ទៅនិយាយ​ជាមួយ​លោក​នេតាន់យ៉ាហ៊ូ ដោយ​បាន​ព្យាយាមទប់​កុំ​ឲ្យ​អ៊ីស្រាអែល​តបតលើអ៊ីរ៉ង់ ព្រោះវាអាចនឹងបំផ្លាញ់ការចរចា ដែល​លោកដូណាល់ ត្រាំ អះអាងជិតបានសម្រេចលទ្ធផល​ហើយ​។

ថ្លែងនៅក្នុងពិធីសំណេះសំណាលជាមួយមន្ត្រីរាជការថ្នាក់ក្រោមជាតិក្នុងខេត្តកណ្តាលកាលពីថ្ងៃ៦ ខែមិថុនា ឆ្នាំ២០២៦ ប្រមុខរដ្ឋស្តីទី លោក ហ៊ុន សែន បានដាក់ការសង្ស័យដោយចោទជាសំណួរថា តើព្រំដែនកម្ពុជា-ថៃធ្លាប់ជាកន្លែងរកស៊ីគេចពន្ធ ឬយ៉ាងណា?។ ការចោទដូចនេះដោយសារតែចំណូលពន្ធគយរបស់កម្ពុជាបានកើនឡើង បន្ទាប់ពីព្រំដែនជាមួយថៃត្រូវបានបិទ។ អ្នកតាមដានសង្គមនានាចោទជាសំណួរដូចគ្នានេះ និងថែមបានអះអាងច្បាស់ៗថា ការរកស៊ីគេចពន្ធនៅតាមព្រំដែនកម្ពុជាជាមួយប្រទេសជិតខាងបានកើតមានឡើងយូរណាស់មកហើយ។ ក្នុងករណីនេះ អ្នកជំនាញជំរុញឲ្យបើកការស៊ើបអង្កេតទៅលើមន្ត្រីពាក់ព័ន្ធនៅតាមព្រំដែនកម្ពុជា និងប្រទេសជិតខាង៕

ការជូនដំណឹងរបស់កម្ពុជាទៅកាន់ភាគីថៃ និងអង្គការសហប្រជាជាតិស្តីពីការចាប់ផ្តើមដំណើរការផ្សះផ្សាដោយបង្ខំក្នុងការដោះស្រាយជម្លោះក្នុងដែនសមុទ្រត្រួតស៊ីគ្នាអាចផ្តល់ជាមេរៀនដល់សង្គមថៃឲ្យយល់ពីការដោះស្រាយបញ្ហាដោយសន្តិវិធីជាជាងការប្រើកម្លាំង។ សង្គមថៃកំពុងតែរស់ក្នុងភាពអំនួត ដោយមិនចង់ដោះស្រាយបញ្ហាដោយសន្តិវិធីជាមួយកម្ពុជា និងគិតតែពីចង់យកឈ្នះកម្ពុជាតាមកម្លាំងបាយ។ នេះបើតាមការវិភាគរបស់អ្នកជំនាញនយោបាយថៃមួយរូបដែលត្រូវបានចែករំលែកបន្តដោយប្រមុខរដ្ឋស្តីទីកម្ពុជា លោក ហ៊ុន សែននៅថ្ងៃទី ៨ មិថុនានេះ។

មន្ទីរបញ្ចកោណបន្ថែមការប្រុងប្រយ័ត្នខ្ពស់ ទាក់ទងនឹងបណ្តាញស៊ើបការណ៍សម្ងាត់របស់អ៊ីស្រាអែល ស្របពេលមេដឹកនាំប្រទេសទាំងពីរ ហាក់កំពុងខ្វែងគំនិត។ នេះបើតាមការចុះផ្សាយរបស់ប្រព័ន្ធផ្សព្វផ្សាយមួយចំនួនរបស់អាមេរិក នៅថ្ងៃសៅរ៍ទី ០៦ មិថុនា។ ការសម្រេចរបស់ក្រសួងការពារជាតិអាមេរិកធ្វើឡើង បន្ទាប់ពីអាមេរិកសង្ស័យថា អ៊ីស្រាអែលព្យាយាមលួចប្រមូលព័ត៌មានសម្ងាត់ និង លួចស្តាប់ការសម្រេចចិត្តផ្ទៃក្នុងរបស់រដ្ឋបាលលោក ដូណាល់ ត្រាំ ពាក់ព័ន្ធនឹងសង្គ្រាមនៅមជ្ឈិមបូព៌ា។

មានវត្តមាននៅ​ឆេ្នរសមុទ្រ​ខេត្ត​Normandie ដើម្បី​រំឭកខួប​៨២ឆ្នាំ​នៃ​ប្រតិបត្តិការ​វាយរំដោះ​ប្រទេស​បារាំង​ពីទាហានណាហ្ស៊ី អាល្លឺម៉ង់ ថ្ងៃទី ៦​មិថុនា រដ្ឋមន្រ្តី​ការពារជាតិ​អាមេរិក​ឆ្លៀត​និយាយ​បរិហាររិះគន់​នយោបាយអន្តោប្រវេសន៍​របស់​បណ្តាប្រទេស​នៅអឺរ៉ុប។ បន្ទាប់ពី​លោក​ដូណាល់ ត្រាំ និង​អនុប្រធានាធិបតី​លោក​JC Vance លោកPete Hegseth ជា​ថ្នាក់ដឹកនាំ​ម្នាក់ទៀត​របស់អាមេរិក ដែល​បាន​ចោទប្រកាន់​អឺរ៉ុបថា កំពុង​បណ្តោយ​ទុក​ឲ្យជនអន្តោប្រវេសន៍ចូល​ឈ្លានពាន តាមផ្លូវសមុទ្រ។

នៅថ្ងៃបិទ​វេទិកា​សេដ្ឋកិច្ច​រុស្ស៊ី កាលពីថ្ងៃ​សៅរ៍ទី ៦មិថុនា ទីក្រុងម្ចាស់ផ្ទះSaint-Petersburg បានក្លាយជាផ្ទាំងស៊ីបវាយប្រហារ​របស់ដ្រូនអ៊ុយក្រែន សាជាថ្មី។ ប្រធានាធិបតីអ៊ុយក្រែន​អះអាងថា បាន​ដៅវាយប្រហារ​មូលដ្ឋានទ័ពជើងទឹក​រុស្ស៊ី​នៅតំបន់​លេនីក្រាត​ក្បែរនោះ​ដើម្បីសងសឹក​នឹង​រុស្ស៊ី​ធ្វើសង្រ្គាមឈ្លានពាន​អ៊ុយក្រែន។ កងទ័ពជើងអាកាសរុស្ស៊ី​បាន​និយាយ​ថា ក្នុងមួយថ្ងៃ​សៅរ៍ម្សិលមិញ រុស្ស៊ី​ស្ទាក់ចាប់​បាន​ដ្រូន​អ៊ុយក្រែន​ជាង​៣០០ នៅក្នុងការវាយប្រហារ​ទ្រង់ទ្រាយធំ​មិនធ្លាប់​មាន។ នៅថ្ងៃអាទិត្យទី ៧មិថុនា អ៊ុយក្រែន​បាន​ចោទប្រកាន់​រុស្ស៊ី​ថា បាន​វាយប្រហារ​លើ​ទីតាំងស្តុក​ឥន្ធនៈនុយក្លេអ៊ែរ របស់អ៊ុយក្រែន នៅ​ទីតាំងរោងចក្រ​នុយក្លេអ៊ែរ  Tchernobyl(ឈែណូប៊ីល)។ ឈាង បុប្ផា​ជូនព័ត៌មាននេះ

នៅរដ្ឋធានីអេរ៉េវ៉ាន ការបោះឆ្នោតសភាដ៏សំខាន់សម្រាប់អនាគតរបស់អាមេនី បានប្រព្រឹត្ត ទៅនៅថ្ងៃអាទិត្យ ទី០៧ មិថុនា។ ការបោះឆ្នោតនេះធ្វើឡើង ក្រោមសម្ពាធពីរុស្សី ដែលចង់រក្សាអាមេនីឲ្យស្ថិតនៅក្រោមឥទ្ធិពលរបស់ខ្លួន ខណៈនាយករដ្ឋមន្ត្រីអាមេនី លោក Nikol Pashinyan ចង់បោះជំហាន នាំអាមេនីឲ្យខិតចូលជិតសហរដ្ឋអាមេរិក និង សហភាពអឺរ៉ុប។ ប្រសិនបើនាយករដ្ឋមន្ត្រីរូបនេះឈ្នះឆ្នោត អាមេនីនឹងបន្តខិតជិតលោកខាងលិច តែបើចាញ់ឆ្នោត ប្រទេសនេះអាចត្រឡប់ទៅស្ថិតក្រោមឥទ្ធិពលរុស្ស៊ីវិញ។

នៅមួយរយៈចុងក្រោយនេះ គេសង្កេតឃើញមានករណីរឈ្លោះវាយប្រតាយប្រតប់គ្នារវាងក្រុមយុវវ័យ បង្ហោះផ្សាយនៅលើបណ្តាញសង្គម។ ជាក់ស្តែងនៅក្នុងវីដេអូមួយលើបណ្តាញសង្គមហ្វេសប៊ុក សិស្សស្រីមួយក្រុមនៃវិទ្យាល័យទួលទំពូងបានទៅព្រួតវាយសិស្សស្រីមា្នក់ នៅវិទ្យាល័យ ហ៊ុន សែន ប៊ុនរ៉ានី ផ្សារដើមថ្កូវ។ នៅក្នុងករណីនេះ ក្រសួងអប់រំបានចេញសេចក្តីណែនាំឲ្យក្រុមដែលបង្កការវាយតប់នោះកែខ្លួន និងត្រូវទទួលពិន័យរដ្ឋបាលមួយចំនួនទៀត។ អ្នកឃ្លាំមើលសង្គមនានា កត់សម្គាល់ឃើញថា ទោះក្រសួងអប់រំតែងតែចេញវិធានការអប់រំ និងរំឭកដាស់តឿនជាបន្តបន្ទាប់ តែបាតុភាពហិង្សារវាងសិស្សសាលានេះនៅតែបន្តកើតមានជាហូរហែ។ នៅក្នុងកាលៈទេសៈបច្ចុប្បន្ននេះ តើអ្វីទៅជាវិធានការសមស្របដែលរដ្ឋាភិបាល ឬអ្នកពាក់ព័ន្ធគួរធ្វើដើម្បីដោះស្រាយបាតុភាពហិង្សារបស់សិស្សនៅក្នុងសាលារៀន?

នៅអំឡុងពេលស្ថានភាពព្រំដែនបានធូរស្រាល ពលរដ្ឋមួយចំនួន ដែល​រស់នៅកៀកព្រំដែនអូរស្មាច់បានសម្រេចចិត្តត្រលប់ទៅផ្ទះសម្បែងវិញ ដើម្បីប្រកបរបរចិញ្ចឹមជីវិត។ ពលរដ្ឋទាំងនោះ​បានប្រាប់ថា ពួកគេ​​នៅតែដិតដាម​ស្នូរសំឡេង​​ផ្ទុះអាវុធ និង​​សំឡេងយន្តហោះទម្លាក់គ្រាប់ ដែលបង្កជាការរំខានដល់សុវត្ថិភាពផ្លូវចិត្តរបស់ពួកគេទាំងថ្ងៃទាំងយប់។ បើទោះជាត្រលប់មកប្រកបរបរចិញ្ចឹមជីវិតធម្មតាហើយ​ពិតមែនក្តី តែផ្ទះសម្បែងរបស់ពលរដ្ឋនៅតំបន់អូរស្មាច់មួយចំនួនមានតែសំបកផ្ទះ និងសម្ភារៈបន្តិចបន្តួចសម្រាប់រស់នៅប៉ុណ្ណោះ។ មានតែសំបកផ្ទះ និងសម្ភារៈតិចតួច​ ព្រោះថាពួកគេបានត្រៀមចិត្តត្រលប់ទៅជំរំសារជាថ្មី ប្រសិនបើស្ថានភាពព្រំដែនតានតឹងខ្លាំង​​៕

ក្រសួងការបរទេសកម្ពុជាបានឱ្យដឹងថា លោកនាយករដ្ឋមន្ត្រី ហ៊ុន ម៉ាណែត នឹងធ្វើដំណើទៅបំពេញទស្សនកិច្ចផ្លូវការនៅប្រទេសវៀតណាម។ បើយោងតាមសេចក្តីប្រកាសព័ត៌មានរបស់ក្រសួងការបរទេស ប្រមុខរដ្ឋាភិបាលកម្ពុជា ក៏នឹងដឹកនាំគណៈប្រតិភូសំខាន់ៗរបស់រដ្ឋាភិបាល និងធុរជនកម្ពុជាអមដំណើរជាមួយផង។ អ្នកជំនាញភូមិសាស្រ្តនយោបាយចាត់ទុកដំណើរទស្សនកិច្ចលើកទី២របស់លោក ហ៊ុន ម៉ាណែត ថាគ្មានអ្វីលើសពីការពង្រឹងទំនាក់ទំនងនោះទេ​។​

សមាគមខ្មែរកម្ពុជាក្រោម ដើម្បីសិទ្ធិមនុស្ស និងអភិវឌ្ឍន៍ បានយកថ្ងៃអាទិត្យ ទី៧ ខែមិថុនា ឆ្នាំ២០២៦ ដើម្បីរំឭកខួប៧៧ឆ្នាំដែលបារាំងផ្ទេរដែនដីកម្ពុជាក្រោមទៅឲ្យវៀតណាមគ្រប់គ្រង។ ឆ្លៀតឱកាសនេះ តំណាងសមាគមខ្មែរកម្ពុជាក្រោម បានទទូចជាថ្មីទៀត ឲ្យអាជ្ញាធរវៀតណាមដោះលែងសកម្មជនខ្មែរកម្ពុជាក្រោមឲ្យមានការសេរីភាពឡើងវិញ ដោយឥតលក្ខខណ្ឌ។ ការអំពាវនាវនេះធ្វើឡើងបន្ទាប់ពីអាជ្ញាធរវៀតណាមទើបចាប់ខ្លួន លោក ថាច់ ចាន់ត្រា កាលពីថ្ងៃទី២៩ ខែមេសា ឆ្នាំ២០២៦ ក្រោយពីលោកបានចែករំលែកព័ត៌មានស្តីពីអាជ្ញាធរវៀតណាមរំលោភសិទ្ធិខ្មែរក្រោម។ 

លោក Liu Ren ប្រធានសភាពាណិជ្ជកម្មខេត្តអានហ៊ុយប្រចាំកម្ពុជាត្រូវបានចាប់ខ្លួននៅរាជធានីភ្នំពេញ កាលពីថ្ងៃទី៥ ខែមិថុនា ឆ្នាំ២០២៦។ បើតាមសារព័ត៌មានជាភាសាចិន CC-Time លោក Liu Ren ត្រូវបានចាប់ខ្លួនពីបទ​ឧក្រិដ្ឋកម្ម​ឆបោកអនឡាញ ការលាងលុយកខ្វក់ ការជួញដូរមនុស្ស ការចាប់ជំរិតទារប្រាក់ និងការជួញដូរអាវុធ។

ថ្លែងនៅក្នុងពិធីសំណេះសំណាលជាមួយមន្ត្រីរាជការថ្នាក់ក្រោមជាតិ​ក្នុង​ខេត្តកណ្តាល​ នៅថ្ងៃ​​​​៦មិថុនាម្សិលមិញនេះ លោក ហ៊ុន សែន​​ ប្រធានព្រឹទ្ធសភាកម្ពុជា ​បានដាក់ការសង្ស័យថា ព្រំដែនកម្ពុជា-ថៃជាកន្លែងរកស៊ីគេចពន្ធ​។ លោក ជា ធីរិទ្ធ អ្នកនាំពាក្យ​ប្រធានព្រឹទ្ធសភា​ បានប្រាប់វិទ្យុបារាំងអន្តរជាតិ RFI នៅព្រឹកថ្ងៃទី​៧មិថុនានេះថា ​ការដាក់ក្តីមន្ទិលយ៉ាងដូចនេះ ក៏ដោយសារតែលោក ហ៊ុន សែន កត់សម្គាល់ឃើញថា ​ចំណូលពន្ធគយបានកើនឡើង បន្ទាប់ពីបិទព្រំដែនកម្ពុជា-ថៃ។  សូមជម្រាបថា ​រយៈពេល​ ៥ខែដើមឆ្នាំ២០២៦នេះ ​កម្ពុជាបានទទួលចំណូលពន្ធដារ​​ជាង ​​២ ០០០ លានដុល្លារ ឬ​ ៥៣% នៃផែនការ​ឆ្នាំ​២០២៦ ​និង​​បើ​បូកជាមួយពន្ធគយ កម្ពុជារកបាន​ចំណូល​សារពើពន្ធសរុបប្រមាណ ​​​​៣ ៥០០លានដុល្លារឯណោះ​។ ​នេះមិនទាន់រាប់បញ្ចូល​​ចំណូលមិនមែន​សារពើរពន្ធផងទេ។​ សម្រាប់លោក ហ៊ុន សែន ចំណូលពន្ធដ៏ច្រើននេះ គឺជាមោទនភាពសម្រាប់កិច្ចការងារប្រមូលពន្ធរបស់រដ្ឋាភិបាលកម្ពុជា​។ ​​​គួរដឹងដែរថា យោងតាមច្បាប់ថវិកាជាតិ ឆ្នាំ២០២៦ រដ្ឋាភិបាលកម្ពុជាគ្រោងប្រមូលចំណូលសារពើពន្ធឱ្យបាន ៦ ៨០០លានដុល្លារ ក្នុងនោះចំណូលពន្ធដារ ៣ ៨០០លានដុល្លារ និងចំណូលពន្ធគយ ៣ ០០០លានដុល្លារ៕

ក្រុមបាល់ទាត់ជម្រើសជាតិអ៊ីរ៉ង់ កាលពីថ្ងៃសៅរ៍ទី ៦ មិថុនាបានចាកចេញពីប្រទេសតួកគីទៅកាន់ប្រទេសម៉ិកស៊ិក ដើម្បីត្រៀមខ្លួនចូលរួមនៅក្នុងការប្រកួតបាល់ទាត់ពិភពលោក World Cup ២០២៦ ដែលត្រូវប្រព្រឹត្តទៅនៅទឹកដីម៉ិកស៊ិក សហរដ្ឋអាមេរិក និងកាណាដា។ វត្តមានរបស់ក្រុមកីឡាករអ៊ីរ៉ង់ នៅក្នុងទឹកដីអាមេរិក ហាក់មិនច្បាស់លាស់ បន្ទាប់ពីផ្ទុះសង្រ្គាមអាមេរិក និងអ៊ីរ៉ង់។ ប៉ុន្តែ នៅថ្ងៃសៅរ៍ទី ៦មិថុនា ស្ថានទូតអាមេរិកប្រចាំតួកគីបានអះអាងថា ស្ថានទូតបានផ្តល់ទិដ្ឋាការដល់ក្រុមកីឡាករអ៊ីរ៉ង់សម្រាប់ចូលរួមក្នុងការប្រកួតជម្រុះនៅទីក្រុង Los Angeles នៅសប្តាហ៍ក្រោយ។

ថ្មីៗនេះ មានការចែករំលែកវីដេអូឃ្លីបមួយនៅលើបណ្តាញសង្គមដែលបង្ហាញពីក្រុមសមត្ថកិច្ចនគរបាលចុះទៅហាមឃាត់សិស្សសាលាមិនឱ្យចែករំលែក ឬនិយាយពីរឿងនយោបាយនៅតាមបណ្តាញសង្គម ក្រោមហេតុផលថា បញ្ហានយោបាយ ត្រូវទុកឲ្យថ្នាក់ដឹកនាំជាអ្នកដោះស្រាយ។ ចំពោះករណីនេះ អ្នកនយោបាយមួយចំនួន លើកឡើងថា ប្រសិនបើវីដេអូនេះជាការពិត នោះវាជាការបង្ហាញពីការរំលោភសិទ្ធិពលរដ្ឋក្នុងការចូលរួម ឬខ្វល់ខ្វាយពីរឿងនយោបាយនៅកម្ពុជា។

នៅថ្ងៃព្រហស្បតិ៍ទី៤ មិថុនា ក្រុមប្រឹក្សាភិបាលនៃសាជីវកម្មហិរញ្ញវត្ថុអភិវឌ្ឍន៍អន្តរជាតិសហរដ្ឋអាមេរិក (DFC) បានអនុម័តកញ្ចប់ហិរញ្ញប្បទានចំនួន ១០០លានដុល្លារ មកឱ្យអាកាសយានដ្ឋានអន្តរជាតិតេជោកម្ពុជា ដើម្បីពង្រីកហេដ្ឋារចនាសម្ព័ន្ធវិស័យអាកាសចរណ៍កម្ពុជា។ លោក ស៊ិន ចាន់សេរីវត្ថា អ្នកនាំពាក្យអាកាសចរណ៍ស៊ីវិលថ្លែងប្រាប់វិទ្យុបារាំងអន្តរជាតិ RFI នៅរសៀលថ្ងៃសៅរ៍ ទី៦ មិថុនានេះថា ការចាត់ចែង និងប្រើប្រាស់កញ្ចប់ហិរញ្ញប្បទានបែបណានោះ គឺអាស្រ័យទៅលើលក្ខខណ្ឌតម្រូវ និងនីតិវិធីផ្ទៃក្នុងរបស់សាជីវកម្មហិរញ្ញវត្ថុអភិវឌ្ឍន៍របស់សហរដ្ឋអាមេរិក និងក្រុមហ៊ុនគ្រប់គ្រងព្រលានយន្តហោះ។ ទោះយ៉ាងណា មន្ត្រីនាំពាក្យអាកាសចរណ៍ស៊ីវិលរូបនេះក៏មិនភ្លេចលើកឡើងពីសារៈសំខាន់នៃហិរញ្ញប្បទានចំនួន ១០០លានដុល្លារ ដែលទទួលបានពីDFC។

ទាហានរបស់លីបង់ជាច្រើននាក់​ស្លាប់នៅក្នុង​ការវាយប្រហារ​ដ៏ព្រៃផ្សៃរបស់អ៊ីស្រាអែល នៅព្រឹក​ថ្ងៃសៅរ៍ទី ៦មិថុនានេះ។ បើតាម​ការប្រកាស​របស់​ក្រសួងការពារជាតិលីបង់ ​រថយន្ត​ដឹក​ទាហាន និង​មន្រ្តីយោធា​ជាន់ខ្ពស់​ម្នាក់​របស់​កងទ័ព​លីបង់​បាន​រង​ការវាយប្រហារ​របស់​អ៊ីស្រាអែល នៅ​ទឹកដី​ភាគខាងត្បូង​របស់​លីបង់។ ប្រធានាធិបតី​លីបង់ កាលពីថ្ងៃសុក្រ​ទី ៥មិថុនា បាន​ប្រាប់​ក្រុមហេសបូឡា​ឲ្យ​ងាកមក​រក​ផ្លូវចរចាការទូត ចំណែក អ៊ីរ៉ង់​ត្រូវ​ឈប់​លូកដៃ​ចូល​កិច្ចការផ្ទៃក្នុង​របស់អ៊ីរ៉ង់ និង​ឈប់​យក​លីបង់​ទៅធ្វើលេស ជាលក្ខខណ្ឌ​ចរចា​បញ្ចប់សង្រ្គាមជាមួយ​អាមេរិក និង​អ៊ីស្រាអែល។

ក្នុងរយៈពេល ៤ខែដំបូង ឆ្នាំ២០២៦ អ្នកទេសចរអន្តរជាតិដែលបានចូលមកទស្សនាប្រទេសកម្ពុជាមានជាង ១,៣លាននាក់។ ពោលគឺបានថយចុះដល់ទៅ ៤៥,៦% បើធៀបនឹងរយៈពេលដូចគ្នា កាលពីឆ្នាំ២០២៥។ នេះបើតាមសិ្ថតិដែលក្រសួងទេសចរណ៍ចេញផ្សាយនៅថ្ងៃសៅរ៍ទី៦ ខែមិថុនានេះ។ ប្រធានក្រុមប្រឹក្សាភិបាលនៃសមាគមទេសចរណ៍កម្ពុជា លោក ហូ វណ្ឌី យល់ឃើញថា វិបត្តិនៃជម្លោះព្រំដែនកម្ពុជា និងថៃ បានរួមចំណែកមួយផ្នែក នៃការធ្លាក់ចុះដ៏គំហុកនៃចំនួនភ្ញៀវទេសចរ ដែលមិនធ្លាប់មាន ក្នុងរយៈពេលជិត ២០ឆ្នាំចុងក្រោយនេះ។ ចំពោះ លោក ហូ វណ្ឌី វិបត្តិតម្លៃប្រេងឥន្ធនៈសកល និងអំពើឆបោកអនឡាញក៏ជាមូលហេតុទាញទម្លាក់ចំនួនភ្ញៀវបរទេស ដែលចូលមកទស្សនាប្រទេសកម្ពុជា។

នៅថ្ងៃសៅរ៍ ទី០៦ មិថុនា ប្រព័ន្ធផ្សព្វផ្សាយរដ្ឋកូរ៉េខាងជើងបានផ្សព្វផ្សាយរូបភាពប្រមុខដឹកនាំកូរ៉េខាងជើងលោក គីម ជុងអ៊ុន និងកូនស្រី ចូលរួមក្នុងកម្មវិធីធ្វើតេស្តសាកល្បងនាវាពិឃាត Kang kon។ កម្មវិធីធ្វើតេស្តនេះ ជាសក្ខីកម្មបង្ហាញពីការបន្តពង្រីកអំណាចយោធារបស់ប្រទេសកុម្មុយនីស្តមួយនេះលើដែនសមុទ្រ ។ ការបង្ហាញពីមហិច្ឆតាយោធាជើងទឹករបស់ព្យុងយ៉ាង ធ្វើឡើងពីរថ្ងៃមុនដំណើរទស្សនកិច្ចផ្លូវរដ្ឋរបស់ប្រធានាធិបតីចិន លោក ស៊ី ជីនពីង នៅកូរ៉េខាងជើង។

ដូចអ្វីដែល​ជាការព្រួយបារម្ភរបស់អង្គការមនុស្ស​ធម៌អន្តរជាតិ សេណារីយ៉ូអាក្រក់ ​កំពុងតែឈានក្លាយជាការពិត ក៏ព្រោះតែ​សង្គ្រាមអូសបន្លាយ​នៅមជ្ឈិមបូព៌ា។ ផ្អែកតាម​អង្គការ​កម្មវិធី​ស្បៀងអាហារពិភពលោក ប្រសិនបើតម្លៃប្រេងនៅតែថ្លៃ ខ្ទង់​​១០០​ដុល្លារក្នុងមួយធុងបារីស មនុស្សយ៉ាងហោច​៤៥លាននាក់​បន្ថែមទៀត នឹងត្រូវប្រឈមនឹងគ្រោះអត់ឃ្លានធ្ងន់ធ្ងរ​។

ច្រកព្រំដែនអន្តរជាតិប៉ោយប៉ែត ក្នុងខេត្តបន្ទាយមានជ័យ ប្រែជាសភាពស្ងប់ស្ងាត់ ដោយសារការបិទច្រកព្រំដែនអស់ជាងមួយឆ្នាំមកនេះ។ ច្រកព្រំដែនកម្ពុជា-ថៃ ដ៏ធំមួយនេះ រឹតតែស្ងាត់ជ្រងំទៅទៀត នៅក្រោយពេលរដ្ឋាភិបាលកម្ពុជាបើកយុទ្ធនាការបង្រ្កាបបទល្មើសឆបោកអនឡាញ។ អាជីវករនៅច្រកប៉ោយប៉ែតមួយចំនួន​​ប្រែទឹកមុខទៅជាស្រពាប់ស្រពោនព្រោះតែការធ្លាក់ចុះចំណូល ក្រោយ​ការចាកចេញរបស់ជនបរទេស​​​​ជាបន្តបន្ទាប់​។ 

នៅកម្ពុជា អ្នកជំនាញបានបង្ហាញក្តីបារម្ភកាន់តែខ្លាំង ក្រោយពីឃើញអ្នកប្រើប្រាស់បណ្តាញសង្គមមួយចំនួនហាក់បាត់បង់សេចក្តីថ្លៃថ្នូរ និងកិត្តិយស ដោយបានស្រែកជេរបញ្ចោរ និយាយហែកហួរគ្នា និងសើចចំអកទៅលើបុគ្គលណាម្នាក់ ក្នុងចេតនា ដើម្បីសប្បាយ និងចង់បានមុខល្បីឈ្មោះ។ អ្នកតាមដានការអភិវឌ្ឍសង្គមបានព្រមានពីហានិភ័យ ប្រសិនបើគ្មានចំណាត់ការណាមួយសមស្របដើម្បីលុបបំបាត់បាតុភាពទាំងនោះ នៅលើបណ្តាញសង្គម។ ប៉ុន្តែទន្ទឹមនេះ ពួកគេបានស្នើឱ្យក្រសួងស្ថាប័នពាក់ព័ន្ធបង្កើនការផ្សព្វផ្សាយ និងបណ្តុះបណ្តាលផ្នែកអក្ខរកម្ម នៅក្នុងប្រព័ន្ធផ្សព្វផ្សាយដើម្បីជាចំណេះដឹងចំពោះប្រជាពលរដ្ឋ។ តើការប្រើប្រាស់បណ្តាញសង្គម ដោយគ្មានសីលធម៌ក្នុងខ្លួន នឹងបង្កហានិភ័យយ៉ាងណាខ្លះដល់សង្គម និងថា អ្វីទៅជាវិធានការទប់ស្កាត់នៅចំពោះមុខ?